英超：易帥後重返勝軌 車路士踩油剷平森林_星島日報

英超頭場，車路士主場迎戰諾定咸森林。「車仔」易帥後即贏波止跌，為爭踢下屆歐洲賽必搏，雖然森林近況唔錯，但已接近上岸，加上嚟緊歐霸盃後顧或有所保留，而且近年交手畀車路士食住，寧捧主勝。（Now 621周一晚10時直播）文:法達斯維

歐戰資格仍未絕望
「車仔」今季內部立立亂，羅仙尼亞季中接替博炒嘅馬利斯卡，好過一輪後又狂輸，最終球季未完已經落鑊，由麥法蘭今季第2度出任看守領隊，上場英足盃4強以1比0擊敗列斯聯殺入決賽。麥法蘭明白自己冇乜機會坐正，最重要令球隊止跌及穩定軍心，例如之前傳有離心即被內部停賽嘅安素費南迪斯，上仗對列斯聯就係靠佢一箭定江山，表現落力，加上爭取下屆歐洲賽資格仲未絕望，戰意唔使懷疑。

另邊廂，森林的確係近況唔錯，各項賽事8場不敗，依家已逐漸走出降班危機，但正正係呢個原因，令佢哋喺聯賽搶分壓力冇咁大，反而嚟緊周中歐霸盃4強次回合作客阿士東維拉，由於森林首回合贏1比0，距離決賽只差一步，冇理由唔搏埋佢，今仗隨時留力。翻查紀錄，「車仔」近4次交手獲3勝1和之餘，之前8次喺周一出戰英超主場賽事，取得7勝1和佳績，要贏有後顧之憂嘅森林冇難度。