國際賽：軍備大檢閱都列強鬥一番_東方日報

喺世界盃決賽周之前，今輪國際賽期兩個比賽日，係各國領隊對「軍備」最後檢閱，跟住就會落實部署戰術同選人，唔少邊緣人都要把握最後機會表現自己，希望可以入選大軍，亮相世界盃大舞台。文:渡邊年

三獅變陣出擊不勝無圭
英格蘭喺溫布萊球場約戰烏拉圭，「三獅兵團」領隊杜曹今次「大包圍」，共召入35人入大軍，並且講明今場同下周會排唔同陣容，藉此觀察各球員，球員肯定會搏命，加上球隊近6場全勝，喺主場球迷打氣之下，對住作客例牌腳軟嘅烏拉圭，肯定不勝無歸，英軍讓1球，上盤值得支持。（周六凌晨3時45分開賽）

領隊杜曹共召入35人，但今場只會有24人應戰，「杜Sir」畀當中11人包括哈利卡尼、迪格蘭賴斯、布卡約沙卡等休息，喺大軍踢完今場之後先至報到，全力備戰對日本，換句話講，今場「三獅兵團」會有一半以上二線兵作戰。

烏拉圭作客曳到爆
其實呢個都係英軍一向做法，上任領隊修夫基2年前備戰歐國盃，3月熱身賽鬥比利時，都派出艾雲東尼及查洛保雲等球員。英格蘭傳媒預料，近期甚少為英軍上陣嘅拉舒福特、禾頓、哈利馬古尼等，會配合祖迪比寧咸、史東斯及比克福特正選出擊。

至於烏拉圭同樣召入多達28名球員，費達歷高華維迪、曼紐爾烏加迪都有入選，領隊比爾沙同樣會派副選球員作觀察，若以雙方二線球員比較，英格蘭平均質素仍比烏拉圭高，而且烏拉圭作客不濟，近10場作客只贏過1場，加上「三獅兵團」近6場全勝，而且全部贏對手

2球或以上，今場有望再下一城。